神户胜利船中场大将恩尼斯达(中)状态持续提升。
名古屋八鲸射手祖奥(右)近期入球停不了。 近期日职联频频大开快车，如果球队阵容厚度不足嘅话，都真系会随时出事。而喺寻晚刚刚结束嘅最新一轮日职联当中，无论系争冠集团定系保组份子，都系有人欢笑有人愁。
睇返联赛上半区，目前暂列第四位嘅神户胜利船虽然有西班牙名将恩尼斯达继续有好表现，但连续两轮联赛取得「士哥」嘅前者依旧无力带领球队喺主场落一哥广岛三箭嘅面。1场1比1嘅和局令到神户胜利船与身后追兵已经无限接近之余，追赶前三位置嘅目标亦系再度放缓。而对于领头羊广岛三箭而言，纵使本轮联赛仅收获1分，但由于分列二、三位嘅川崎前锋和FC东京本轮同告唔争气齐齐失分，故领先优势仍在。
至于联赛下游地带，上轮联赛短暂迎来反弹嘅大阪飞脚未能够食住道势再下一城，被札幌冈萨多攻击手都仓贤喺比赛结束前扳平比数后，无奈收获1分嘅大阪飞脚目前已经滑落至联赛副班长嘅位置，保组前景已经响起警报。相反，此前曾长时间喺联赛包尾嘅名古屋八鲸近来则迎来强势反弹，喺本轮挥军击败横滨水手后，豪取四连胜嘅佢哋已经喺积分榜攀升至倒数第三位。虽然保组依旧系任重而道远，但喺近4轮联赛攻入7球嘅外籍射手祖奥嘅领军下，名古屋八鲸彷佛已经睇到咗逃出鬼门关嘅曙光。