川崎前锋正大步向榜首之位迈进。
大阪飞脚急需谂计。 逐渐开始斗入直路嘅日职联如今无论争冠定系保组都可谓渐见真章，而喺啱啱呢个周末进行嘅第二十三轮联赛当中，当然亦系有人欢喜有人愁。
虽然目前领跑神射手榜嘅广岛三箭前锋A.柏德烈喺本轮赛事当中继续有「士哥」，但仍然无法为球队带嚟一场胜仗。喺主场1比2不敌争冠最大对手川崎前锋后，犹如失咗6分嘅一哥广岛三箭目前喺打多一轮嘅情况下领先优势已被缩窄至6分，曾被认为坐定粒六嘅联赛锦标亦再度掀起涟漪。至于志在来届亚冠资格嘅神户胜利船喺本轮联赛亦迎嚟利好消息，由于排名第三嘅FC东京继续沉沦，因此本轮喺湘南比马身上全取3分嘅神户胜利船亦系进一步迫紧前者。对于恩尼斯达嚟讲，欧冠就踢得多喇，来季感受下亚冠嘅不一样风情自然亦系美事一桩。
保组情况相比上半区其实更加惨烈，目前从联赛第十一位至第十八位，积分差距均并非遥不可及，系生系死恐怕真系要斗到最后一刻先可以揭晓。不过暂时殿后嘅大阪飞脚和长崎成功丸嘅护级前景就确实已经亮起黄灯，喺本轮均双双落败嘅情况下，大阪飞脚过去11轮联赛仅得1胜，而长崎成功丸过去9轮则输足7场。单凭目前如此状态，降班确实并非危言耸听。