广岛众将正齐心协力奔向冠军。 相信广岛三箭嘅拥趸如今定必心旷神怡，因为喺啱啱过去嘅一轮日职联中，佢哋爱队喺积分榜嘅领跑优势顺利得到扩大，距离今季联赛锦标亦系又近一步。
经历此前短暂下滑之后，一哥广岛三箭近来终于重现领头羊之气势，随住本轮主场击退鹿岛鹿角后，过去2轮联赛攞足6分嘅佢哋总算可以松一口气。与此同时，今季神射手奖最大热门A.柏德烈状态嘅持续火热亦系广岛三箭喺余下赛事中最大争胜法宝。当然，广岛三箭嘅拥趸除咗要感恩A.柏德烈之外，都一定要多谢目前保组心切嘅大阪飞脚。皆因后者本轮联赛令人意外地阻击排名次席嘅川崎前锋，不仅成功终结川崎前锋嘅连续5轮不败势头，同时亦令到广岛三箭喺积分榜上踢多1轮嘅情况下将领先优势拉大到9分。喺联赛已经兜入直路之际，广岛三箭已经隐约睇到咗冠军奖杯嘅身影。
喺本轮联赛当中，前列集团失分嘅并非只有川崎前锋，此前一度觊觎榜首位置嘅FC东京继续低迷，佢哋目前就连联赛第三嘅位置都已经岌岌可危。至于季中有名将恩尼斯达加盟嘅神户胜利船近来亦遭遇联赛两连败，下季亚冠资格同佢哋已经渐行渐远。