长崎成功丸和磐田山叶喺本轮联赛中未能分出胜负。 嚟到季尾，日职联无论争冠定保组都一样好睇过戏，其中对比争冠嘅幸福烦恼，关乎生死嘅保组战显然更加残酷。
喺寻日结束嘅一场第30轮嘅日职联赛事中，目前均身处积分榜下游地带嘅长崎成功丸和磐田山叶经过90分钟嘅鏖战，最终激战成和各取1分。但对于如今保组形势愈发不利嘅两队嚟讲，一场和局显然系两败俱伤，远远未能够起到止渴嘅作用。
睇返目前日职联积分榜，30轮过后仅得29分嘅长崎成功丸继续坐稳联赛副班长之位，距离逃出生天起码仲有两场波嘅分差，加上喺自己争气嘅前提下，仲要寄望身前一众为生存而战嘅队伍失分，话佢哋已经半只脚入紧去来季日乙绝非危言耸听。不过与往年相比，今季需要担心降班安危嘅球队明显增多，从第11位嘅横滨水手到第17位嘅柏雷素尔，数支球队彼此间分差最多都未到两场波差距，可以讲，一场波嘅胜负可能就会决定你系生系死。
除咗个别球队尚有补赛之外，今季日职联仅余4轮，究竟边队最终可以逃出生天我哋一齐见证。