祖奥毫无疑问系名古屋八鲸嘅命脉。 除咗个别几队之外，今季日职联已经战罢30轮，冠军与保组嘅争夺自然引人入胜，但喺另一个战场，竞争同样系异常激烈。
睇返赛季至今嘅日职联神射手榜，亚洲双星缠斗巴西军团嘅格局已经相当明显。目前分别占据神射手榜头两位嘅巴西籍射手祖奥和A.柏德烈均有20球进账，喺剩余联赛寥寥无几嘅情况下，佢哋二人的确系最有可能夺得今季金靴宝座嘅人选，一举收复上季被本土姜夺走嘅外国军团殊荣。
不过目前分列神射手榜第3、4位嘅小林悠(入15球)和黄佑祖(入14球)亦肯定唔会轻言放弃。其中小林悠喺上季就已经为本土射手争光，成功取得联赛金靴殊荣，而佢近期脚头亦尚算畅顺，喺川崎前锋堪称联赛顶级嘅进攻火力衬托下，小林悠喺余下数轮联赛中发挥绝对不容忽视。至于南韩射手黄佑祖，大阪飞脚能够喺联赛尾段逐渐逃出生天亦绝对系佢嘅功劳。皆因喺球队近期一波联赛六连胜期间，黄佑祖一人贡献5球，为球队取胜保驾护航嘅同时，如此火热嘅食糊势头亦令佢随时会成为金靴争夺战中嘅最大黑马。