亨利要尽快谂计挽救摩纳哥。 随住喺本周中欧冠分组赛作客不敌马德里体育会后，摩纳哥已经提前一轮「光荣」成为A组垫底球队。曾经与同国土豪球队巴黎圣日门斗到难分难解嘅摩纳哥，如今境况真可谓系差天共地。
虽然金钱绝对唔系无所不能，但喺职业赛场中，球队喺财政方面嘅实力就一定系一个决定性因素。喺卡塔尔土豪班主源源不断嘅大水喉射住之下，尼马等一大批当今球坛炙手可热嘅球星纷纷转投巴黎圣日门，令到如今嘅巴黎王子公园球场星光熠熠。相反摩纳哥咁多年嚟一直靠卖人为生，想当年2016-17赛季嘅法甲夺冠班底中，汤马士利马、贝拿度施华、T.费宾奴、巴卡约高和摩天奴等众多功臣喺近两季都无一幸免被高位套现，其中当红炸子鸡麦巴比被圣日门天价策反更加系两队实力对比出现一面倒嘅最大象征。
目前法甲14轮战罢，堪称无敌嘅圣日门保持全胜之余，均场攻入3.29球失0.5球嘅攻防表现更加宣判咗佢哋蝉联桂冠只系时间问题。与此同时，喺本轮欧冠分组赛力挫英超豪门利物浦后，圣日门晋级前景已经较为明朗，佢哋只需喺末轮击败同组实力最弱嘅贝尔格莱德红星就可以从死亡之组C组中昂首出线。相反摩纳哥不仅欧冠提前出局，喺目前法甲中更加14轮仅得2胜，手握10分排名倒数第二位，与上季排名第二位嘅风光相比，佢哋如今甚至需要开始考虑要为生存而战。
唔经唔觉，2019年都已经同大家招紧手，可以留俾摩纳哥继续沉沦嘅时间已经唔多，且看目前嘅掌舵人亨利(Thierry Henry)接下来能否带领球队置诸死地而后生。