卡塔尔坚持青训终迎丰收之时。 随住球证嘅一声哨响，赛前被广泛睇好嘅日本最终大热倒灶，喺亚洲杯决赛舞台上以1比3不敌卡塔尔。呢个结果虽然看似意外，但卡塔尔称王实则亦在情理之中。
一个国家嘅足球运动想要蓬勃发展，植根青训毫无疑问系不二之选。日本足球之所以能够一直站在亚洲顶端，其根本就在于过去相当长嘅一段时间一直喺青训系统上默默耕耘，如今一个又一个新星嘅诞生都系整个国家青训系统丰收嘅成果。虽然日本喺今届亚洲杯最终屈居亚军，但如富安健洋和堂安律等啱啱20岁出头嘅年轻新星已经喺本届赛事上崭露头角，同时年纪轻轻嘅佢哋已经赴欧洲赛场搵食，假以时日带领日本重新站上亚洲之巅系绝对可预期。
至于笑到最后嘅卡塔尔，佢哋喺今届亚洲杯上表现如此出色绝对算得上系厚积薄发。喺2004年，卡塔尔国内成立咗阿斯拜尔精英体育学院，通过15年嘅耕耘和巨大嘅金钱投入后，如今已经同样到咗丰收嘅日子。其中早喺2014年U19亚青杯上，卡塔尔就一举夺魁。而当时针行到2019年，卡塔尔喺亚洲杯决赛周舞台上用7战全胜仅失1波嘅统治级表现顺利站上亚洲顶峰既系突破，同时亦都算系水到渠成。与此同时，活力十足嘅卡塔尔如今阵中人才济济，其中喺本届赛事上攻入创纪录9波嘅前锋艾莫尔兹阿里便光芒四射，佢更加被评为本届赛事的最佳球员。而与艾莫尔兹阿里同为22岁嘅艾菲夫喺今届赛事中同样发挥抢眼。喺呢班后生仔嘅扶持下，加上阿斯拜尔精英体育学院源源不断咁制造新血，卡塔尔足球喺未来绝对不容忽视。
既然讲起青训，我哋又点可以唔提下国足咧？锐意发展青训嘅卡塔尔已非昔日吴下阿蒙，但备受国人追捧嘅中国男足却仍然犹如扶不起的阿斗。正如日本足球所信奉嘅观念，简单嘅事情只要一直坚持去做，未来就会变得唔简单。但中国足球向来急功近利，符合足球发展规律嘅道路往往喺国内搵唔到合适嘅土壤生存。喺本届亚洲杯赛事中，半准决赛惨吞伊朗三蛋遭淘汰嘅国足虽然喺成绩上已经算尽力而为，但同日本等国相比，人哋20岁出头嘅球员已经逐渐喺国家队上位，反观国足喺本届赛事先逐渐有一批1989年左右出世，年近三张嘢嘅球员开始承担更多责任。与此同时，近日中超赛场上亦系风云万变，流言四起，不仅传话要将部分球队化身成「国家队集训队」，将各支队伍嘅国脚统一安排转会至单一球队，方便喺联赛中一齐训练；而且近来中超各队更加频频觊觎甚至签入部分有中国血统嘅归化球员，更加不惜放弃实力更为出众嘅外援。究竟选择行一条「捷径」嘅中国足球能否完美迎来华丽转身，我哋只能够拭目以待。