苏斯克查或者就系曼联帅位嘅真命天子。 2019年3月7日，系一个平凡嘅工作日，但对于曼联拥趸嚟讲，呢日注定不平凡。
如果喺寻日清晨之前，各位去问任何一位红魔鬼粉丝对于欧冠晋级前景嘅话，相信输得体面专心争联赛前四会系一个最为实际嘅答案。而喺十六强次回合出征巴黎之前，摆喺红魔鬼面前嘅都系一道道难题：首回合主场2球落败、包括普巴在内嘅多位大将都因停赛或受伤无法登场等。但最终拉舒福特喺比赛最后时刻却用一记十二码帮圣日门埋单，红魔鬼亦因此成为欧冠历史上第一支，首回合淘汰赛喺主场落后2球或以上，次回合喺客场逆转晋级嘅球队。
好多波友都笑言，原本只系期待苏斯克查嚟短暂救火，但原来自费Sir退休之后嘅真命天子却因此浮出水面。拥有红魔鬼DNA嘅呢位少帅自上任以嚟，带俾拥趸嘅惊喜可谓系一浪接一浪，战术风格张弛有度嘅佢成功激活咗普巴和拉舒福特，而令球队重拾过往嘅「魔」性更加系让球迷感概万千。正式转正对于苏斯克查嚟讲相信只系时间问题，纵然理智告诉我哋，球队无可能会一直风调雨顺，但起码苏斯克查令我哋喺逆风中睇到咗希望，漆黑中等嚟咗黎明。
2019年3月7日有太多魔迷肆意欢笑，亦有太多曼联死忠泪流满面，纵然经过一日时间嘅沉淀，呢场欧冠惊天逆转仍然彷如一首美妙乐章一样余音绕梁。当然，晋级欧冠半准决赛并非系终点，喺下周一凌晨，红魔鬼又将喺联赛中迎嚟与阿仙奴嘅争四关键战。但正所谓念念不忘，必有回响，苏斯克查嘅呢班波已经准备好重拾荣光。