曼城最终成为今季英超最后赢家。 再美妙嘅乐章，都总有曲终人散嘅一刻；再激烈嘅赛事，亦都总会迎嚟一声哨响嘅来临。喺经历成个赛季嘅高潮起伏之后，堪称史上最强嘅2018-19赛季英超终迎大结局。
哥迪奥拿领军嘅曼城最终排除万难喺今季成功卫冕，但喺呢个冠军嘅背后，却系曼城同史上留名嘅最强追赶者利物浦纵横成个赛季嘅争夺血汗史。利物浦今季有几强？佢哋最终喺今季英超攞到97分，呢个积分不仅系英超历史第三高积分，同时亦都系欧洲五大联赛历史上最强亚军，打破咗西甲豪门皇马喺2009-10赛季缔造嘅「96分亚军」此等接近不可能复制之纪录。成个赛季落嚟，利物浦喺联赛中仅得一败(30胜7和1负)，如此高光嘅表现却最终未能换嚟一座英超锦标，确实令人产生既生瑜何生亮嘅感叹。
当然，能够喺如此强横嘅利物浦手中夺走联赛冠军宝座，曼城嘅表现肯定值得大家脱帽致敬。尤其喺季尾被利物浦追到气都咳嘅情况下，曼城最终用一波14连胜将冠军宝座牢牢握在手中，而过去两个赛季合共取得198个联赛积分亦充分证明曼城如今嘅统治力。不过能够将曼城调教成为如今英超嘅鬼见愁，西班牙教头哥迪奥拿绝对系居功至伟。喺佢嘅领军下，曼城如今踢法鲜明，从过往巴塞嘅tiki taka踢法到如今因地制宜更加追求效率嘅攻防体系，哥迪奥拿用自己对于足球呢项运动嘅理解及不断学习，为曼城谱下咗一段段美妙嘅乐章。佢不单止成为继费Sir及摩连奴(Jose Mourinho)之后，第三位喺英超成功卫冕嘅领队，同时更加毫无疑问正逐渐成为曼城嘅教父。
英超一向被誉为世界上竞争最为激烈嘅联赛，但如今如果话英超系最强嘅联赛相信都无太多异议。睇返今季欧冠同欧霸，两项足坛盛事嘅决赛席位竟然被4支英超球队(欧冠为热刺对阵利物浦、欧霸为车路士对阵阿仙奴)包办，甚至令到外界笑称好似睇紧英格兰足总杯同英格兰联赛杯决赛嘅感觉。全季英超落嚟，20支球队总共奉献咗1067个入球，呢个数字既创造咗英超改为38轮后嘅入球纪录，同时亦再一次证明咗本赛季嘅伟大。
Big Season Big Games，令人难忘嘅2018-19赛季英超最终以曼城成功卫冕而圆满收场，今季英超注定余音嫋嫋。而从2018年走到2019年，英超场内外每一个精彩嘅瞬间都时刻陪伴住大家，纵然本季乐章终迎最后一个音符，但相信一首更美妙嘅2019-20英超乐章已经准备好演奏。