藤本宪明今季继续用入波为大分三神保驾护航。 相信如果唔系长期关注日本波嘅球迷，应该都对大分三神呢班波嘅了解少之又少。经过数季嘅浮沉之后，大分三神终于喺今季破茧而出，用低调有力嘅步伐走出属于自己嘅不平凡之路。
今季日职联12轮过后，大分三神录得7胜3和2负嘅不俗战绩手握24分排名第三，对于一支规模唔大嘅升班马而言，呢个成绩绝对系超出预期。其中本土前锋藤本宪明嘅贡献绝对唔简单，赛季至今已经攻入7波嘅佢不仅贡献球队接近一半嘅进攻火力，而且更加喺射手榜上同一众外籍射手斗得难解难分。藤本宪明喺上季就用入球替大分三神喺日乙中南征北战，如今喺日职联舞台上，呢位本土前锋依旧为球队保驾护航。
其实大分三神近年行过嘅道路绝非一片坦途，喺2013年从日职联不幸降班之后，大分三神喺呢几年甚至经历过降班至日丙嘅黑暗日子。幸好坚韧嘅佢哋喺上季日乙终于惊险占据积分榜次席，成功取得一席升班资格，顺利回到日职联呢个大舞台上。
与一众耳熟能详嘅豪门队伍相比，大分三神或者更加似日常生活中嘅一个平凡人，无大富大贵嘅背景，甚至无足够厉害嘅技能。但只要一步一脚印咁走好每一条路，始终坚持不放弃，即使再平凡嘅球队都一样可以走出一条不平凡之路。