维拉成功重返英超。 如果各位波友身边有阿士东维拉嘅拥趸，恭喜你，因为今日随时有餐开心饭食；但如果身边有打比郡嘅粉丝，咁就真系避得就避，因为佢哋如今生人勿近。点解咁讲？皆因决定生死嘅英冠附加赛决赛喺寻晚隆重上演，维拉最终喺温布莱球场笑到最后。而且呢场波唔单止关乎成季嘅努力及一个英超嘅资格，喺收益上更加达到匪夷所思嘅地步。
睇返呢场英冠附加赛决赛，我哋可以首先从经济嘅角度去感受一下赛事嘅重要性。随住英超喺全球范围内嘅成功推广，如今任何一支英超球队每赛季单纯喺电视转播费上就可以赚取至少7940万英镑嘅收入。而喺未来两个赛季中，得益于降落伞补偿政策(英超会向降班球队分期发放呢笔补偿金，目的系帮助佢哋承受降班造成嘅经济打击)，维拉即使下季不幸降班，方方面面加埋至少可以取得1.7亿英镑嘅整体收入。至于落败嘅打比郡，就真系渣都无，同时只能够下季喺英冠中从头嚟过。
如果想对比更加强烈，我哋可以再睇睇世界其他主流赛事嘅夺冠奖金：NFL超级碗(625万美元)和NBA总决赛(330万美元)。
喺2015-16赛季降班之后，维拉过去3季喺英冠嘅日子并不好受。作为英格兰最为老牌嘅队伍之一，维拉参加英超嘅总场数喺所有踢过英超嘅球队中排名第7(924场)，长时间喺英冠混迹显然系一种煎熬。与此同时，喺呢段沉沦嘅岁月当中，维拉阵中早已面目全非，星味大减。不过能够喺常规赛仅得第五，最终于附加赛中一路笑到最后，老牌队伍嘅底蕴喺呢一刻可谓完美展现。对于维拉而言，今仗事关生死嘅胜仗或者只系佢哋全季始终努力不懈嘅一个缩影，成功升班嘅功臣唔系本场有入波嘅艾加斯或者约翰麦真恩，而系属于每一位为呢个结果奋斗过嘅维拉人。
落败者打比郡值得所有人嘅尊重，佢哋以常规赛第六名嘅身份能够最终站上决战嘅舞台本身就已经系一种胜利。但我哋更加会将掌声送俾维拉，送俾不离不弃嘅广大维拉人，2019-20赛季英超赛场，维拉返嚟喇！