巴西系本届美洲国家杯嘅夺冠大热。
队长保罗古里路(中)系秘鲁进攻端嘅一大倚仗。 虽然本赛季嘅欧洲五大联赛已经落下帷幕，但各位球迷朋友唔使失落，皆因好波陆续有嚟。本周末，万众期待嘅2019美洲国家杯就会喺巴西隆重举行。巴西、阿根廷以及乌拉圭等南美洲劲旅届时将会为争夺冠军施展浑身解数，究竟边个可以最终「笑傲美洲」？大家到时拭目以待喇。
本届美洲国家杯分组赛共分成3个小组，每组4支球队，巴西、阿根廷以及乌拉圭三大劲旅分散喺各组当中，因此赛事观赏性大大增加。今日笔者首先为大家介绍一下A组嘅各支参赛队伍，夺冠大热巴西与秘鲁、委内瑞拉以及玻利维亚同分喺A组，就牌面嚟睇，巴西显然高出几班。目前澳彩开出嘅巴西夺冠赔率为2.18，遥遥领先于各个竞争对手，足以反映出球队实力之强劲。
讲到巴西，无论有无关注开足球嘅人应该都知佢哋好犀利，历史上曾5次赢得世界杯冠军，而美洲国家杯夺冠次数更加多达8次，现时世界排名高踞第三，球队无论实力抑或底蕴均傲视群雄。但值得留意嘅系，巴西对上一次喺美洲国家杯称雄已经系12年前嘅事，长时间无缘锦标对于巴西嚟讲显然难以接受，再加上今届赛事喺本土举行，相信巴西一众将士定必格外卖力，以求再尝冠军滋味，球员战意之浓烈毋庸置疑。提到如今嘅巴西就肯定要提下尼马，作为巴西嘅头牌，全国上下都对其寄予厚望，佢亦一心想喺本次赛事当中大展拳脚，可惜人算不如天算，喺此前嘅热身赛当中，尼马脚踝受伤，遗憾缺席本届美洲国家杯，对于巴西以及广大波友嚟讲无疑系一大损失。幸好巴西一向人强马壮，就算无咗尼马都够杀，佢哋阵中依旧猛将如云，有费明奴以及加比尔谢萨斯等人冲锋陷阵，中场线由菲腊比古天奴、费南甸奴以及卡斯米路等人领衔，后防线方面则有泰亚高施华、丹尼艾华斯以及马昆奴斯等人压阵，前中后三线实力均属顶尖。更为令拥趸放心嘅系，巴西现时配备咗艾达臣和艾利臣碧卡两大门神，喺门将位置上嘅双重保险无疑为巴西增添不少争标本钱。至于状态方面，巴西现时算得上系如日中天，近10场友谊赛，佢哋豪取9胜1和佳绩，如此势头足以让一众对手胆寒，实力与状态兼备嘅巴西最终出线可谓板上钉钉。
喺巴西基本预留一个出线名额嘅情况下，秘鲁、委内瑞拉以及玻利维亚3队将要为出线资格争得头崩额裂，虽然话最好成绩嘅第三名都有机会晋级到淘汰赛，但锁定前二杜绝后顾之忧显然系呢几支队伍嘅主要目标。综观秘鲁、委内瑞拉以及玻利维亚征战美洲国家杯嘅历史可以发现，秘鲁和玻利维亚都曾经有登顶嘅经验，而委内瑞拉喺本项赛事当中嘅最好成绩仅为第四名，球队经验方面或有所输蚀。另外，委内瑞拉阵中缺乏大牌球星，球队整体战斗力并唔算强，而且佢哋最近4仗热身赛仅取得可怜嘅一场胜利，其余1和2负，状态实在不能予人信心，因此笔者并唔睇好委内瑞拉会出现喺本组前二之列。至于秘鲁和玻利维亚之争，笔者认为绝对系秘鲁秤先，因为玻利维亚夺冠已经系半个世纪前嘅事，佢哋近年喺本项赛事显得碌碌无为，而且球队最新嘅FIFA排名当中仅位列63位，与秘鲁足足差咗42位，而喺澳彩本项赛事夺冠赔率当中，玻利维亚以200倍垫底，球队显然不被外界睇好。更为令人担忧嘅系，玻利维亚已经好耐未试过赢波嘅滋味，最近7场友谊赛，球队战绩仅为3和4负，演出十分糟糕，以呢种状态出战美洲国家杯，玻利维亚确实难寄厚望。反观秘鲁，佢哋如今嘅FIFA排名为21位，实力不容小觑，而且球队最近10年喺呢项赛事当中两次收获季军，可见佢哋颇具竞争力。此外，秘鲁本期大名单当中不乏保罗古里路和化芬等实力派球星，佢哋均代表国家队出场超过80次，经验相当丰富。更为利好嘅系，秘鲁近年面对玻利维亚以及委内瑞拉均处于上风，球员喺心理方面无疑占优，由此可见，秘鲁最终位列A组前二的确系情理之中。
综上所述，笔者对A组嘅形势预测为：巴西和秘鲁分列前二，其中实力明显占优嘅巴西将会以首名出线。至于玻利维亚将与委内瑞拉火并，尽量争取较好成绩，力争以最好成绩第三名过关，但毕竟还要视乎另外两组嘅形势，因此最终结果会系点只有最后先知。