利物浦终于一尝英超冠军滋味。 人生有几多个十年？呢句话曾经令到唔少人有所触动。而对于利物浦球迷嚟讲，恐怕要问一句，人生有几多个三十年？
喺车路士力挫曼城后，31轮过后手握86分嘅利物浦已经领先身后嘅曼城23分，提前7轮封王。喺打破英超最早夺冠纪录嘅同时，佢哋更加继1989-90赛季之后，时隔30年再次夺得国内顶级联赛冠军，一扫未有英超冠军嘅多年闷气。
喺歇斯底里嘅狂喜面前，再谈更多嘅纪录和数字都显得如此嘅苍白无力，呢一刻，系属于利物浦球迷嘅狂欢，亦系属于各位利记粉丝喺不同社交平台嘅刷屏。正所谓人生得意须尽欢，喺呢个利物浦时间中，恐怕已经搵唔到适合嘅词汇可以准确表达出The Kop们嘅心情，开心，满足，又带点吐气扬眉嘅发泄。
利物浦嘅呢个冠军，当然要对主帅克洛普领军嘅球队上下予以崇高嘅敬意，喺上季成季联赛就输1场都无缘冠军嘅情况下，球队今季并未泄气，而且最终能够以如此巨大嘅优势卷土重来达成目标，当中嘅努力大家可想而知。但此时此刻我哋更加唔可以忘记利物浦过去一大批名将嘅名字，从早期嘅科拿(Robbie Fowler)、麦马拿文(Steve McManaman)、奥云(Michael Owen)和加历查(Jamie Carragher)，到开始转型嘅沙比阿朗素(Xabi Alonso)、托里斯(Fernando Torres)、苏亚雷斯和永远嘅队魂谢拉特(Steven Gerrard)，众多名将都曾经在此为球队再次站上国内顶级联赛之巅而努力过，而正正系一代代利物浦将士嘅坚持，如今终于得偿所愿都可算系对坚持不懈嘅最好回报。
You'll Never Walk Alone！