西维尔再一次站上欧霸之巅。 提起欧冠杯，各位波友心中可能会即时浮现起好多球队嘅名字；但若果讲起欧霸杯，相信西维尔呢三个字绝对会系首先映入眼帘。
随住今日凌晨以3比2气走意甲豪门国际米兰再次站上欧霸之巅后，计埋2006-07呢两年喺欧霸杯前身欧协杯嘅夺魁，西维尔已经喺欧霸舞台上合计有6次笑到最后(其余4次分别喺2014、2015、2016和2020年)。难怪已经有波友笑称，欧霸杯不如改名成为西维尔杯。
其实西维尔嘅班底乃至投入放眼喺今届欧霸参赛队伍中绝非最突出嘅队伍，但能够一路淘汰罗马、狼队、曼联以及国际米兰顺利捧杯，主帅卢比迪古可谓功不可没。喺经历西班牙国家队和皇马两度失败嘅执教经历之后，呢位备受质疑嘅本土教头喺去年夏天接过咗嚟自西维尔嘅救命稻草。而喺佢嘅出色调度之下，球队今季不仅重返西甲前四，同时亦领军喺福地——欧霸赛场成功登顶。诸如即将离队去搵真银养老嘅中场宾尼加，近年四处奔波嘅卢克迪庄和奥甘普斯等将士都喺卢比迪古嘅战术体系下发光发热，呢位本土教头嘅知人善用亦正正系佢曾经引以为傲嘅资本。
当然，西维尔能够喺欧霸舞台上始终保有竞争力，球队嘅传承同样好重要。喺夺冠后，西维尔队长拿华斯亦系继2006年随队捧杯后再次夺得此殊荣。如今新一代西维尔球员已在快速成长，就正如拿华斯当年嘅初出茅庐。一代人终将老去，但总有人正年轻。
喺如今呢个球坛土豪横行嘅时代当中，西维尔嘅坚挺或者系另外一种感动。