夏维斯系车路士于转会市场最新收获。 唔经唔觉，英超新赛季嘅脚步已经越嚟越近，本周六晚上富咸同阿仙奴就将会上演2020-21赛季嘅揭幕战。而喺好戏开启之前，又点少得一齐盘点下英超各路豪强嘅转会动态。
经历咗美斯呢个几乎成真嘅美梦之后，立志要喺新赛季收复失地嘅曼城喺今夏转会期动作暂时唔算大，西班牙中场新星费兰托里斯和荷兰后卫阿基嘅相继到嚟可以令哥迪奥拿用兵更多选择，而就嚟倾掂数嘅拿玻里中坚高列巴尼则有望为曼城后防线加一把可靠嘅大闸。对于本身班底已经够晒雄厚嘅曼城嚟讲，新赛季向各条战线发起有力冲击绝对不成问题；类似嘅情况仲有利物浦，兵多将广嘅卫冕冠军目前喺转会市场上选择相当谨慎，只对拜仁中场A.泰亚高情有独锺，但传闻巴塞隆拿都想食回头草，利物浦引援之路注定唔会平坦。
要数今夏转会期最幸福嘅球迷，相信非一众车迷莫属，皆因捷维尔、泰亚高施华、薛耶治、夏维斯和迪姆华拿呢5位大将都被佢哋收归门下，账面实力大增嘅车路士自然系今季英超冠军嘅有力争夺者，欢欣嘅车迷都不禁要讲返句：「阿巴莫域治好嘢！」至于「流量小生」曼联今夏则好好演绎咗乜叫声东击西嘅好戏，正当外界以为佢哋会一直同多蒙特就积顿辛祖嘅转会纠缠不清之际，云迪碧克嘅突然驾临令人直呼意外，呢位荷兰新星一直被指系皇马或者巴塞嘅猎物，曼联嘅笑到最后莫非亦都系新赛季嘅一个好兆头？
去到伦敦双雄热刺同阿仙奴，两队都算得上系作出咗针对性嘅补强，其中前者祖夏特和马特杜靴迪嘅双双到嚟增强咗防线嘅厚度，而贺尔比格则可以令中场线拥有更多可能性。至于阿仙奴虽然暂时只有车路士旧将韦利安来投，但身经百战嘅佢有望为略显稚嫩嘅阿仙奴中场线注入宝贵经验。
当然，我哋亦都唔可以忽略如李斯特城、狼队和安察洛堤领军嘅爱华顿等有力制造麻烦嘅队伍，其中好似狼队重金购入葡萄牙超新星法比奥施华就证明佢哋嘅吸引力绝唔简单，「文迪斯宇宙」又记一功。
本周六，一齐嚟同英超有个约会吧！