曼城讓兩球又如何

1盧卡東尼：曼城出閘例牌勁，自2011/12球季開始，年年英超開鑼必贏波，今次對住升班馬白禮頓雖然作客，但高對手成兩班波，贏面一樣大。哥迪奧拿今夏執過條邊線，兩隻閘走上走落快咗，攻守轉換流暢好多，作客讓球半/兩球，要捧上盤好似好難落手，但前一季咪照贏西布朗三球！三支升班馬中，白禮頓擴軍最唔積極，就算上季英冠踢到曉飛，嚟到英超未必有作為，哥迪奧拿想攞頭威，𠵱家上天就畀個好機會佢。
2何西：荷甲班霸「大」得起
荷甲兩大班霸阿積士同燕豪芬周六齊齊出戰首場聯賽，PSV季前歐霸盃尷尬出局，狀態似乎麻麻地，今場對住一向入波多嘅阿爾克馬爾入球必多。阿積士作客荷華高斯都係大手交易格，兩場「入球大細」都開[2.5/3]，一於串晒佢。
3咖喱：車仔前線缺人吼「細」
利物浦仲未簽到中堅，前線就有新兵穆罕穆德沙拿，睇嚟會延續上季有前冇後嘅風格，所以捧「大」；車路士今場冇迪亞高哥斯達同夏薩特，艾華路莫拉達又未係好適應，右翼衞域陀摩西斯又停賽，攻力應該麻麻，所以捧「細」。
4筋肉人：神軒抵讚撐硬紅軍
紅軍喺香港捧走亞洲挑戰盃，兩場比賽都踢得唔錯之餘，對香港球迷又夠熱情，尤其佐敦軒達臣盡顯隊長風範，主動聯絡等咗幾日都緣慳一面嘅死忠球迷，認真唔話得，單係呢點都值得支持。
5仙道彬：博默郡雙雄響頭炮
英超剛開鑼，睇歷史數據沒意思，今次支持默郡雙雄。利記在港睇過，勤操勤練，狀態已起，古仔問題雖未明朗，要作客贏屈仔不難；至於拖肥有月巴回巢，加上今夏斥巨資增兵同踢完歐霸外，陣容都勝過對手史篤城甚多。
6守丹：信朗尼翻生有貨賣
愛華頓今季擺明想搞事，前中後三線都簽咗啲有份量嘅球員，同埋講堅細佬我覺得朗尼應該仲有料到，對作客一向都麻麻嘅史篤城，讓半/一起碼食半格是常識，不過話晒係季初，買少少先再睇定啲，總知拖肥要跟進啦！
7牽牛：馬賽串圖盧茲穩陣
雲尼亞里今季教法甲球隊南特，不過落筆打三更，首戰已經輸三球，今次主場對馬賽，馬賽有皮耶、文丹達等前英超兵，主隊都唔多睇好；圖盧茲一向主場唔錯，應該贏到蒙彼利埃，串埋呢個上盤。
黑腳心聲：反底靠愛隊阿積士
8吾中：剛剛當上夏日擂台盟主，以為可以喺新球季乘勝追擊，點知八月份擂台貼士就如江河日下，暫時喺擂台包緊尾。雖然季初球隊未完全上力，戰果多數利「細」同下盤，不過既然我咁黑，就一於逆思考，買晒兩支默西賽德郡球隊，雖然利物浦今場冇古天奴，但中前場夠晒人，新兵沙拿同蘇蘭基都相當對辦，今場波作客屈福特贏波冇問題。另一推介係我愛隊阿積士嘅上盤，作過關3串4，睇吓結果係點先！