雖然預測邊隊可奪得今季英超冠軍言之尚早，但從各隊組軍嘅積極性及實力而言，曼市雙雄嘅奪標機會，比Big 6其餘4隊車路士、熱刺、阿仙奴及利物浦更大，經過頭2輪聯賽之後，就筆者嘅預測似乎已露出端倪。
曼聯開季連贏2場狂轟8粒，新加盟嘅箭頭盧卡古早早落實來投，有利於球隊磨合，近日紅魔重新簽回神鋒伊巴謙莫域，絕對係錦上添花，因為鋒線有盧卡古、拉舒福特、安東尼馬迪爾、米希達利恩等眾多配搭，可讓老將伊巴無後顧之憂下養好傷勢先復出，而且伊巴屬於1年1簽性質，亦非斥天價嘅大收購，對紅魔財政影響不大，而板櫈深度進一步加強。
曼城同樣人才鼎盛，今夏買人嘅花費比紅魔更闊綽，不過主帥哥迪奧拿嗰套傳控打法，喺佢執教巴塞時有中場沙維控制節奏，配合無所不能嘅球王美斯及擅於化繁為簡嘅「小白」恩尼斯達，才可發揮到極致，觀乎「藍月亮」現有人腳，難以踢出呢類「地上最強」般嘅統治式打法。加上紅魔開季賽程嘅對方比較易打，有利率先領放，正所謂「人追你好過你追人」，對佢哋爭標非常有利。
金句：今季紅魔買人早落實，伊巴回歸係錦上添花。