丹麥神奇球隊

各大聯賽今個星期讓路畀國際賽，除咗亞洲區一早落實邊幾隊有份進軍明年世盃決賽周，今輪只係打友賽，其他各洲氣氛就好緊張，尤其最多人熟悉嘅歐洲區，可能有部份實力唔差又或一向被視為傳統勁旅嘅國家，連附加賽資格都未必有份。大家可能第一個會講荷蘭，但小弟更關注嘅係位於E組暫排第三嘅丹麥。
丹麥唔係歐洲頂級強隊，但呢隊波自從80至90年代出現咗勞特立兄弟同舒米高後，都有唔少支持者。小弟阿哥就成日講起1986年世盃，話丹麥嗰屆分組賽打得好燦爛，進攻節奏好快，連西德都贏過，但16強輸畀有布達堅奴領銜嘅西班牙1:5。
至於小弟波齡較淺，認識佢哋都唔係該國史上首奪大賽錦標嘅92歐國盃，而係98世盃，印象最深刻當然係八強以2:3飲恨畀巴西，仲記得白賴仁勞特立射入2:2嗰球，瞓喺地下個睡美人慶祝姿勢嗎？
過咗98後，丹麥喺大賽舞台唔算有咩代表作，反而04歐國盃同瑞典喺分組賽好似夾計咁整死意大利，呢個污點仲多人提。
丹麥對上一次入大賽係2012歐國盃，當年只得20歲嘅基斯甸艾歷臣，家陣已經25歲，喺熱刺踢得風生水起。小弟覺得艾歷臣呢段時間處於黃金年齡，如果今屆見唔到丹麥，佢都肯定入選冇得踢世盃嘅最佳11人。不過，艾歷臣又未使絕望，周四只要幫丹麥作客贏到排第二兼同分嘅黑山，咁就至少可以望到個附加賽資格；比起A組嘅荷蘭，丹麥機會確實樂觀啲！